1979an Zikuñagako Ama Birjina desagertu zen eta Hernaniko biztanleek irudi ikoniko bat galdu zuten. Zulo bat horma-hobian. Zuzendariaren aita, Juanmi Gutiérrez zinegilea, duela urte batzuk hil zen. Orain, denbora tarte bat pasa denean, bere filmetara itzuli da memoria pertsonaleko ariketan. Irudien bitartez egiten du memoria. Edo, hobeki erranda, irudi ezaren bitartez.

Faisaien uhartea munduko jabekidetza txikiena da. Urtearen erdian Espainiako estatuari dagokio eta beste erdian estatu frantsesari. Laida eta Sambou, bertako bikote bat, irlaren aitzinean dabiltza pasaietan. Bi pertsona ikusiko dituzte ibaia igerian zeharkatzen, beste aldera heltzera saiatzeko. Egun batzuk geroago, hilotz bat agertuko da uhartearen subiranotasun-trukea eginen duten momentu berean. Nork hartuko du bere gain?

Zazpi emaztek, gela batean, terapeuta batek gidaturik, gorputzak poliki mugimenduan jarri dituzte. Dantza terapiak aurrera egiten duen artean, iraganean jasan zituzten tortura fisiko eta psikologikoen lekukotasun hunkigarriak emanen dituzte.

Akelarre musika taldea 70. hamarkadan sortu zen, euskara hutsezko errepertorioaren alde egiten lehenetarikoak izan ziren eta beren rock kantuak, ingelesezko taldeen euskarazko bertsioekin nahasten zituzten. Azken diskoa atera eta hogei urte geroago, beren ibilbidearen kontaketa egiten digute.

1937. urtean gerlarengatik etxetik kanporatuak izan ondoan, Karmelek eta bere familiak ihes egiten dute, Ipar Euskal Herrira lehenik eta Parisera gero. Ihesaldian, Karmelek erbesteko euskal enbaxada kulturalaren proposamena jasotzen du, dantza eta musika ikusgarrien bidez gerlaren kontra borrokatzeko. Bainan, Txominen ezagutza egitean, bere borrokak forma sekretuago bat hartuko du…

1984eko otsaila. Kanpoan haizeak leihoa jotzen duen bitartean, Mauleko gela xume batean, Zaraitzuko espartingile talde bateko neskak eztabaidan ari dira. Gauzak gaizki doaz, batzuk ez dira bertan jarraitzeko prest. Ezin dute. Baina otsaila da, eta etxera itzultzeko, Nafarroan, Pirinioak zeharkatu behar dira. Bidaia arriskutsua da. Zenbat prest izanen lirateke halakorik egiteko?